Aap ek achhi life achieve kar lete ho. Ek badhiya si car, ek pyaara sa ghar, family khush, bank account me 10 lakh ka balance. Har cheez sahi direction me chal rahi hai. Aapne kaafi mehnat ki, aur uska result aapke paas hai. Lekin kya yehi aapka goal tha? Ya fir ye goal sirf samaj se liya hua tha, jo aapko lagta tha sahi hai? Kya aapka goal blur hai?
Meri kahani yahin se shuru hoti hai. Jab mere mind me ye sawaal aaya – maine sab kuch achieve kar liya, business bhi hai, paise bhi hain… lekin sukoon nahi hai. Agar mai is sab ko aur aage le jaata hoon, to uske baad kya?
Log aksar fail isliye nahi hote kyunki unhone mehnat nahi ki, balki isliye hote hain kyunki unko sahi direction ka pata hi nahi hota. Aur agar pata hota bhi hai, to wo us moment ko samajh nahi paate ki yahi sahi time hai action lene ka.
Main aapko koi motivational lecture dene nahi aaya. Bas kuch sochne layak baatein karni hain — jo meri soch ka hissa hain, aur shayad aapki zindagi ke kisi kone se bhi jud jaayein.
1. Paisa vs Sukoon
Ye line hum sab ne suna hai. Aur shayad kahi na kahi isko maante bhi hain. Lagta hai ki paisa hoga to sab kuch control me hoga — badi gaadi, shandar ghar, aaram ki zindagi, jo chaho wo le lo, kha lo, ghoom lo…
Lekin ek sawal puchhta hu – kya yehi sukoon hai?
Agar paisa hi sab kuch hota to jitne log crorepati hain, wo sab khush kyun nahi hote? Itne bade-bade celebrities, businessmen – paise ki koi kami nahi, fir bhi anxiety, depression, sleepless nights inke liye bhi common kyun hai?
Kyuki paisa sab kuch khareed sakta hai… lekin “mann ka sukoon” nahi.
Aap duniya ka sabse mehenga mattress le sakte ho, lekin neend nahi.
Aap 5-star dinner le sakte ho, lekin bhukh ka asli maza nahi.
Aap duniya ke har kone me ghoom sakte ho, lekin agar mann bechain hai to Taj Mahal bhi boring lagega.
Paisa zaruri hai, lekin paisa sab kuch nahi hai.
Sukoon milta hai apne andar se – jab aap jaante ho ki aap sahi raste par ho, jab guilt nahi hota, jab aap kisi aur ke expectations ke neeche nahi, balki apne satisfaction ke peeche jee rahe ho.
Aur sabse badi baat – sukoon milta hai jab aap khud se khush ho.
Isliye kabhi ye mat sochna ki “ek baar paisa aa jaye, fir sab theek ho jayega.”
Nahi bhai, sab kuch tab theek hoga jab aap andar se theek ho jaoge.
2. Career & Passion
Kabhi socha hai? Aap chahe jis bhi field me ho — teacher, designer, marketer, ya koi chhoti si job bhi — usi field ke andar ek aisa kaam hota hai jo aapke dil ko sukoon deta hai.
Zaroori nahi har kaam paisa aur sukoon dono de. Lekin agar tum dhyan do, to tumhare apne kaam ke andar hi ek esa hissa hota hai jisme tum khudko kho dete ho, bina kisi reason ke, bina kisi expectation ke.
Dekho, hum sab paisa kamane ke liye ek career choose kar lete hain. Office jate hain, deadlines meet karte hain, clients handle karte hain… sab kuch.
Lekin usi routine ke andar ek chhota sa hissa hota hai — ek aisa kaam jo paisa kamane ke liye nahi, dil se hota hai.
Wo kaam chaahe chhota ho ya bada, jab aap usse karte ho na to ek satisfaction milta hai, mann kehta hai – “yehi to tha jo mujhe karna tha.”
Aap uske baare me sochne lagte ho, usko aur behtar banane ki planning karte ho, aur jab wo kaam khatam hota hai na… to andar se ek khushi milti hai.
Jo paisa bhi nahi de sakta.
Bas wahi hissa hota hai aapka asli passion. Wo kaam jisme paisa secondary lagta hai, aur satisfaction primary.
Lekin hum aksar uss feeling ko ignore kar dete hain…
Kyuki zimmedariyaan hoti hain, bills hote hain, tension hoti hai.
Aur hum sochte hain ki jab paisa aa jayega, tab passion pe focus karenge.
Par bhai sach ye hai — agar dono cheezein ek field me mil jayein to?
To life ek level pe pahuch sakti hai jahan kaam bhi kaam nahi lagta.
Jaise maan lo, aap ek graphic designer ho. Sab kaam kar lete ho — poster, banners, logos sab.
Lekin jab video editing karte ho, to aesa lagta hai ki waqt ruk gaya ho… ek flow me chale jaate ho.
Na paisa yaad aata hai, na time.
Wo moment hi batata hai ki — yahi mera real zone hai.
Aapko sirf uss zone ko identify karna hai. Usme aur deeply jaana hai.
Aur agar possible ho, to dheere-dheere uss zone ko apne full-time career me badalna hai.
Zindagi wahi badalti hai, jahan kaam me sukoon ho aur sukoon me growth ho.
3. Sahi waqt kab aayega?
Bohot log kehte hain – “thoda sab kuch set ho jaaye, fir discipline banaunga…”
“Thoda paisa aa jaye, fir apne sapne pe kaam karunga…”
Bhai, sach ye hai ki wo sahi waqt kabhi nahi aayega.
Aur agar aaya bhi, to us waqt tumhare andar ka junoon marr chuka hoga.
Zindagi ka asli time wahi hota hai jab tum thoda extra fight karte ho, khud se, duniya se.
Kyuki wahi waqt tumhe baad me sukoon deta hai.
Soch ke dekho – agar tumne abhi thodi aur mehnat ki, apne comfort zone se bahar nikal kar kuch shuru kiya, to kal jab tum peeche dekhoge, tumhe regret nahi hoga.
Par agar tumne abhi kuch nahi kiya, sirf sochte rahe, to ek din baad me tum ye sochke hi sad ho jaoge –
“Kaash us waqt thoda aur koshish ki hoti.”
Aur bhai, duniya ka koi bhi paisa us “kaash” ko mita nahi sakta.
4. Kya Tumne Koshish Ki Thi?
Zindagi mein sirf career, paisa, ya goals hi important nahi hote… ek aur cheez hoti hai jo hume andr se complete feel karwati hai — kisi apne ko paa lena.
Kabhi kisi se itna pyaar hua hai ki tumhara dil chahta ho wo tumhari zindagi ka hissa ban jaye? Ho sakta hai abhi koi ho tumhari life mein… ya ho sakta hai koi tha, jise tum bhool nahi paa rahe. Shayad tumhara connection itna gehra tha ki tum uske bina khud ko adhoora mehsoos karte ho. Lekin… tumne uske liye koshish kitni ki?
Yahin se sukoon shuru hota hai.
Zindagi ka sabse bada guilt yeh hota hai ki humne kisi apne ko paane ke liye puri koshish nahi ki. Shayad uss waqt darr tha, situation kharab thi, ya hume laga “baad me dekh lenge.” Aur baad me?
Wo insaan kisi aur ke saath chala gaya… ya waqt ke saath door ho gaya… aur tum sochte rahe — “Kaash ek baar aur bol diya hota… kaash thoda aur lad liya hota…”
Lekin agar tumne us waqt apni taraf se 100% koshish ki hoti na… chahe result kuch bhi hota… tumhara guilt zero hota. Tum sukoon me hote.
Soch ke dekho — agar tum apni taraf se jo karna chahiye tha wo sab kar chuke hote, to aaj tumhare dil me guilt nahi, clarity hoti. Shayad wo tumhare saath nahi hota, lekin tum kisi aur ke saath khushi se jee paate — bina guilt ke, bina us purani kahani ke dard ke.
Yeh baat sirf love tak seemit nahi hai bhai,
Yeh har us connection pe apply hoti hai jo dil se tha…
Jaise kisi dost se dosti toot gayi ho, ya family ke kisi member se gap aa gaya ho.
To point simple hai:
Kya tumne apni taraf se sab kuch kiya tha?
Agar kiya, to sukoon milega.
Agar nahi kiya, to wo ek chhoti si kami, zindagi bhar chubhti rahegi.
5. Regret se bura kuch nahi hota
Tum fail ho jao, chalega.
Tum thak jao, chalega.
Tum gir jao, chalega.
Par agar tumne try hi nahi kiya, to bhai, tum zindagi bhar restlessness feel karoge.
Wo guilt, wo bechaini, wo khali-pan… ye sab tumhara sukoon cheen lega.
Zindagi ka asli taste tab hi aata hai jab tum sab kuch dekar kehte ho –
“Ab mere haath me kuch nahi tha. Maine puri koshish ki.”
Aur Ant me…
“Uske baad kya?”
Jab ye sawaal dimag me aaye… to iska jawab aapke andar hi milega mai sirf apko rasta dikha sakta hu.
Lekin uske baad sukoon aana chahiye.
Aur sukoon tabhi aayega jab tum apne faisle khud loge, apne passions, apne rishton, apni zimmedariyon ko samajhkar jeena shuru karoge.
Jeet ya haar ka farak tab nahi padta jab tumne koshish poori ki ho.
To bhai, chaahe wo career ho ya koi rishta —
koshish adhuri mat chhodo.
Inside My Mind by Ejaz Saifi